hal-e-dil bad se bad-tar hua dekhiye
aap ka kaam hai dekhna dekhiye
vo jo rakkha hua hai jahan ke liye
aap ḳhud bhi to vo aa.ina dekhiye
aql valon ki imdad ke vaste
jan-ba-kaf hai koi sar-phira dekhiye
shahr jal bujh gaya log mar kab ga.e
sub.h-e-nau kal naya hadisa dekhiye
is tamasha-e-ahal-e-siyasat ko aap
dekh sakte hain bas barha dekhiye
apne ausan khoti zamin hi nahin
asman ko bhi marta hua dekhiye
ek halat hai dil ki kuchh aisi bhi jab
ḳhud ko mumkin hai ḳhud se juda dekhiye
jalva-farma hai jo apne andar use
dam-ba-dam dekhiye ja-ba-ja dekhiye
ek duuje se ukta ga.e aadmi
in se ukta.ega kab ḳhuda dekhiye
shiddat-e-gham hai main bhi huun pyasa ‘amar’
aas paas ab koi mai-kada dekhiye
Leave a Reply