tumhare paas rahen ham to maut bhi kya hai
magar jo duur kaTe tum se zindagi kya hai
jab uTh ke chal diye tum tirgi umaD aa.i
jo tum na ho to charaghon ki raushni kya hai
kuchh aise phuul bhi guzre hain meri nazron se
jo khil ke bhi na samajh paa.e zindagi kya hai
bas un ki yaad ke ham paanv chuum lete hain
hamen ḳhabar nahin meraj-e-bandagi kya hai
kabhi jo gosh-bar-avaz ho ke us ko suno
tumhen pata bhi chale saz-e-ḳhamushi kya hai
miri nigah ne kya kya na ḳhvab dekhe hain
tiri nigah ne ik baat si kahi kya hai
hamin ne zulmat-e-hasti men dil jala.e hain
ye ham samajhte hain darman-e-tirgi kya hai
ubhar rahi hai jo rah rah ke dil ki dhaḌkan men
vo aarzu hai ki hai us ki bebasi kya hai
ḳhizan-nasib hon nazren jo ahl-e-gulshan ki
to phir bahar ke jalvon ki tazgi kya hai
jahan men ye kabhi majbur hai kabhi muḳhtar
hai ek sho.abada ‘azad’ aadmi kya hai
Leave a Reply