Azhar Inayati
vo mera yaar tha mujh ko na ye ḳhayal aaya
main apne zehan ka sab bojh us pe Daal aaya
ab us ke paas koi sang phenkne ko nahin
faza men aḳhiri patthar bhi vo uchhal aaya
tamam bhiiḌ men ik main hi pur-sukun tha bahut
tamam bhiiḌ ko mujh par hi ishti.al aaya
ajab junun hai ye intiqam ka jazba
shikast kha ke vo paani men zahr Daal aaya
kal apne-ap se jab laḌte laḌte haar gaya
to ek shaḳhs ka phir der tak ḳhayal aaya
vo be-sabab hi ḳhafa tha magar main aaj ‘az.har’
gale men us ke bhi banhon ka haar Daal aaya
Leave a Reply