Shauq Bahraichi
na jab dekhi ga.i meri taḌap meri pareshani
pakaḌ kar un ko jhonTe khinch laaya shauq-e-uryani
libas ijad kar aisa koi ai aql-e-insani
ki tan-poshi ki tan-poshi ho uryani ki uryani
ma.az-allah vo kafir-ada ka husn-e-pinhani
ki ab ḳhatre men hai har ik musalman ki musalmani
bata deti hai baḌh kar un ke jalvon ki faravani
ki ghar se be-hijabana nikal aa.i hai mughlani
ma.az-allah janab-e-shaiḳh ka ye josh-e-imani
samajhte hain buton ke hukm ko ayat-e-qur.ani
jise dekho rakhe hai sar pe apne taj-e-sultani
hansi ThaTTha samajh rakkha hai har ik ne jahanbani
tamanna.en miri pamal yuun karta hai vo zalim
kisi mauza.a men jaise khet jote koi dahqani
har ik ki ḳhatiren hasb-e-maratib hongi dozaḳh men
vo naseh hon ki zahid hon ki mulla hon ki mullani
ḳhuda mahfuz rakkhe fitrat-e-insan se aalam men
muaddab ho ke kahta hai jise shaitan bhi ustani
sada hirs-o-havas se duur rahna chahiye hamdam
ye donon hain baḌi fitna jeThani hon ki devrani
ba-qadr-e-zauq takmil-e-tamanna ‘shauq’ kya hoti
ki ham ne aurten pa.in kabhi andhi kabhi kaani
hain yaksan zahid-e-kam-aql hon ya naseh-e-nadan
khilaune sab barabar hain vo chini hon ki japani
vo naseh hon ki vaa.iz hon ki qaa.id hon ki rahbar hon
inhin logon se phaili hai jahan men nasl-e-insani
jafa.en ham pe hoti hain karam ghairon pe hota hai
yahan girte hain ole aur vahan barsate hain paani
mujhe barbad kar ke dost pachhtane se kya hasil
chura kaare kunad aaqil ki baaz aabid pashemani
zara hushiyar rahna rahbaro is hirs-e-duniya se
na luḌhka de tumhen dozaḳh men ye shaitan ki naani
Leave a Reply