muḳhalifin ko hairan karne vaala huun
main apni haar ka elaan karne vaala huun
suna he dasht men vahshat sukun paati hai
so apne aap ko viran karne vaala huun
faza men chhoḌ raha huun ḳhayal ka taa.ir
sukut-e-arsh ko gunjan karne vaala huun
miTa raha huun ḳhirad ki tamam tashbihen
junun ka rasta asan karne vaala huun
haqiqaton se kaho hoshiyar ho jaa.en
main apne ḳhvab ko mizan karne vaala huun
koi ḳhuda-e-mohabbat ko ba-ḳhabar kar de
main ḳhud ko ishq men qurban karne vaala huun
saja raha huun tabassum ka ik naya lashkar
hujum-e-yas ka nuqsan karne vaala huun
Leave a Reply