haath aae to vahi daman-e-janan ho jaae
chhut jaae to vahi apna gareban ho jaae
ishq ab bhi hai vo mahram-e-be-gana-numa
husn yuun laakh chhupe laakh numayan ho jaae
hosh-o-ghaflat se bahut duur hai kaifiyyat-e-ishq
us ki har be-khabari manzil-e-irfan ho jaae
yaad aati hai jab apni to tadap jaata huun
meri hasti tira bhula hava paiman ho jaae
aankh vo hai jo tiri jalva-gah-e-naz bane
dil vahi hai jo sarapa tira arman ho jaae
pak-bazan-e-mohabbat men jo bebaki hai
husn gar us ko samajh le to pasheman ho jaae
sahl ho kar hui dushvar mohabbat teri
use mushkil jo bana len to kuchh asan ho jaae
ishq phir ishq hai jis ruup men jis bhes men ho
ishrat-e-vasl bane ya gham-e-hijran ho jaae
kuchh mudava bhi ho majruh dilon ka ai dost
marham-e-zakhm tira jaur-pasheman ho jaae
ye bhi sach hai koi ulfat men pareshan kyuun ho
ye bhi sach hai koi kyunkar na pareshan ho jaae
ishq ko arz-e-tamanna men bhi lakhon pas-o-pesh
husn ke vaste inkar bhi asan ho jaae
jhilmilati hai sar-e-bazm-e-jahan sham-e-khudi
jo ye bujh jaae charagh-e-rah-e-irfan ho jaae
sar-e-shorida diya dasht-o-bayaban bhi diye
ye miri khubi-e-qismat ki vo zindan ho jaae
uqda-e-ishq ajab uqda-e-mohmal hai ‘firaq’
kabhi la-hal kabhi mushkil kabhi asan ho jaae
Leave a Reply