main ne chup ke andhere men ḳhud ko rakha ik faza ke liye
hujra-e-zat men raushni laane vaali dua ke liye
be-sada sa.aton men sama.at ki raftar rukne ko thi
ek aahaT ne mujh se kaha jaag jaao ḳhuda ke liye
ek dushman-nazar meri narmi pe iman laane ko hai
main ajab intiha par khaḌa huun kisi ibtida ke liye
koi ḳhush-qamati a.ine ke muqabil sambhalti hui
koi tadbir-e-nazzara simTi hui ik ada ke liye
ek hairat se lipTi hui ik subuk-doshi-e-pairahan
muztarib hai achanak bichhaḌ jaane vaali haya ke liye
ik safar hausle aur ḳhvahish ki tasdiq karta hua
ek raste pe ma.adum hote hue naqsh-e-pa ke liye
meri ankhen aur in men chamakte hue mustaqil faisle
jagmagate rahenge yunhi aane vaali hava ke liye
is se pahle ki manzil andheron men tabdil hone lage
qafile se kaho rahnuma DhunD le rahnuma ke liye
vus.at-e-asman sub.h-e-parvaz ka koi muzhda suna
shaḳh-e-hasrat pe baiThe hue ta.ir-e-be-nava ke liye
ek bagh-e-ta.alluq kisi chashm-e-hairan men abad hai
ai ḳhuda is nazare ko sarsabz rakhna sada ke liye
‘azm’ is arsa-e-na-muradi se ghabra ke ye mat kaho
aisi be-rang si zindagi kis liye kis jaza ke liye
Leave a Reply