Syed Shakeel Desnavi
us se bhi aisi ḳhata ho ye zaruri to nahin
vo bhi majbur-e-vafa ho ye zaruri to nahin
log chehre pe ka.i chehre chaḌha lete hain
vo bhi khul kar hi mila ho ye zaruri to nahin
ab ke jab us se milo haath daba kar dekho
ab bhi vo tum se ḳhafa ho ye zaruri to nahin
justuju kis ki hai ye dasht-e-fana ke is paar
vo koi aur raha ho ye zaruri to nahin
daar pe khinche ga.e kitne zamane men ‘shakil’
har koi iisa raha ho ye zaruri to nahin
Leave a Reply