tohmat-e-hasrat-e-parvaz na mujh par bandhe
vaj.h kya khol ke sayyad ne phir par bandhe
baghban ghaat men sayyad hamesha maujud
ashiyan baagh men bulbul kaho kyunkar bandhe
jo chhuri dekh ke qassab ki tharrate the
shan-e-haq hai vahi ab phirte hain ḳhanjar bandhe
kal kiya tha jo mire chak-e-gareban men rafu
is ḳhata par ga.e hain aaj rafu-gar bandhe
ho chuka tha jo mire tez-pari se agah
chust kar ke mire sayyad ne shahpar bandhe
sho.ara kha.enge kya kya na abhi to dhoke
sarv bandhe koi us qad ko sanobar bandhe
mo.ajiza lab tira goya kare ai rashk-e-kalim
jo zaban sehr se ye chashm-e-fusun-gar bandhe
mutma.in baiTh tu sayyad na kar qaid-e-shadid
huun main paband-e-mohabbat tira be-par bandhe
bagh-e-alam men usi ke liye hai nashv-o-numa
surat-e-ghuncha rahe ganTh men jo zar bandhe
bosa manga jo shab-e-vasl to bola hans kar
kahin aisa na ho har roz ki tu kar bandhe
dil ki betabi se Tanke mire sab TuuT ga.e
paTTi jarrah kaho zaḳhm pe kyunkar bandhe
le to ja.ega ḳhat-e-shauq magar rashk ye hai
ashiyan baam par us ke na kabutar bandhe
ummati kya karen aljua na chilla.en agar
bhuuk men jabki nabi peT pe patthar bandhe
iftira karne men tufan hai vo shoḳh-e-zarif
tutiya taaza koi aur na mujh par bandhe
mujh sa mahram tire mahram ka na hoga koi
beshtar khol diye band aur akasr bandhe
dast-e-san.at se bane us ke agar tujh sa but
kyuun hava apni ḳhuda.i ki na aazar bandhe
sha.iri ke liye lazim hai talazum na chhuTe
la.al lab ko tire tu danton ko gauhar bandhe
pa-e-raftar agar hote to chalta-phirta
‘rind’ murda sa paḌa rahta na yuun sar bandhe
Leave a Reply