hausle the kabhi bulandi par
ab faqat bebasi bulandi par
ḳhaak men mil ga.i ana sab ki
chaḌh ga.i thi baḌi bulandi par
phir zamin par bikhar ga.i aa kar
dhuup kuchh pal rahi bulandi par
khil rahi hai tamam ḳhushiyon men
ik tumhari kami bulandi par
ham zamin se yahi samajhte the
hai bahut raushni bulandi par
gir ga.i hain samaj ki qadren
chaḌh gaya aadmi bulandi par
zindagi dekh kar hui hairan
aa ga.i maut bhi bulandi par
mujh se sahra panah mange hai
dekh vahshat meri bulandi par
ham zamin par gire bulandi se
ḳhaak uḌ kar ga.i bulandi par
ek dil par kabhi hukumat thi
ya.ani main tha kabhi bulandi par
khal rahi hai kuchh ek logon ko
meri maujudgi bulandi par
hai ḳhuda samne mere maujud
aa ga.i bandagi bulandi par
Leave a Reply