naghma-e-ishq-e-butan aur zara ahista
zikr-e-nazuk-badanan aur zara ahista
mere mahbub ki yadon ke bhadakte hain charagh
ai nasim-e-guzaran aur zara ahista
jis taraf se vo guzarte hain sada aati hai
ai qarar-e-dil-o-jan aur zara ahista
dil har ik gaam pe logon ne bichha rakkhe hain
aur ai sarv-e-ravan aur zara ahista
kucha-e-dost men ahista-ravi ke ba-vasf
dil ye kahta hai yaan aur zara ahista
un pe mauj-e-nafas-e-gul bhi giran guzre hai
pursish-e-gham-zadagan aur zara ahista
bandh kar ahd-e-vafa koi gaya hai mujh se
ai miri umr-e-ravan aur zara ahista
kam ibadat se nahin zikr buton ka bhi ‘aziz’
baare tausif-e-butan aur zara ahista
Leave a Reply