zamana ab ye kaisa aa raha hai
ki har badmast sambhla ja raha hai
jalati hai ḳhirad sham.on pe sham.en
andhera hai ki baḌhta ja raha hai
dua.en kar rahe hain ahl-e-sahil
safina hai ki Duuba ja raha hai
magar baḌhti nahin hai baat aage
zamana hai ki guzra ja raha hai
bhara tha rang jis ḳhake men barson
vo ḳhaka yak ba yak dhundla raha hai
mohabbat aap hi manzil hai apni
na jaane husn kyuun itra raha hai
main ḳhud tasvir banta ja raha huun
tasavvur men mire kaun aa raha hai
kisi se phir mohabbat ho rahi hai
mujhe phir pyaar dil par aa raha hai
nigah-e-ishq ki vus.at na puchho
jahan-e-husn simTa ja raha hai
juda us ko na samjho karvan se
‘imam’ ik bankpan se aa raha hai
Leave a Reply