Sarwar Nepali
jo log rah ga.e hain miri dastan se duur
kuchh is jahan se duur hain kuchh us jahan se duur
har dastan-e-gham hai miri dastan se duur
jaise ki koi qais ho ah-o-fughan se duur
tu gar nahin hai paas to kya ranj mujh ko hai
ye zindagi kahan hai tiri dastan se duur
jab tak tire visal ki surat nahin koi
ji DhunDhta hai ghar koi donon jahan se duur
hai teri kahkashan bhi miri kahkashan ke paas
tera falak kahan hai mire asman se duur
har saans us ke pyaar ko sajda kiye gaya
‘sarvar’ kabhi raha hi nahin apni maan se duur
Leave a Reply