Ain Tabish
qissa-e-ḳhvab huun hasil nahin koi mera
aisa maqtul ki qatil nahin koi mera
hai bapa mujh men ajab ma.arka-e-sud-o-ziyan
is laḌai men muqabil nahin koi mera
bahta jaata huun main gumnam jaziron ki taraf
vo samundar huun ki sahil nahin koi mera
hai ajab baat ki dushman ka taraf-dar bhi hai
aisa lagta hai ki ye dil nahin koi mera
roz deta hai mire samne auron ki misal
aur kahta hai mumasil nahin koi mera
Leave a Reply