ye sach hai un men ye baten to haan hain
baḌe bad-zan nihayat bad-guman hain
ghalat hai ye vo ham par mehrban hain
kahan apni samajh hai ham kahan hain
na ye puchhen na aa.e hijr men maut
ḳhuda bhula hai but na-mehrban hain
nahin uThte hain aa kar ghair hargiz
mohabbat men yahi bar-e-garan hain
subut-e-ishq hai lab ḳhushk sard aah
chhupa.en kya ki ye sab to ayaan hain
na puchho be-ḳhudi-e-ishq ham se
ḳhabar bhi kuchh nahin hai ham kahan hain
vo kuchh samjhen suna den hal-e-dil to
yahi na vo nihayat bad-guman hain
jab aaya navak-e-qatil su-e-dil
jigar hi bol uTTha ham yahan hain
abhi ukta ga.e tum hazrat-e-dil
mohabbat men hazaron imtihan hain
hamen bahla ke rahte hain gham-o-ranj
yahi furqat men goya mehrban hain
na kyon rashk aa.e baḳht-e-mudda.i par
ki vo us par bahut hi mehrban hain
karen kis tarah chahat un ki ham kam
abhi nam-e-ḳhuda vo naujavan hain
kabhi kar di thi zahir ḳhvahish-e-vasl
jabhi se to bahut vo bad-guman hain
hasinon men nahin koi bura.i
magar ik aib ye hai bad-zaban hain
na kyon lutf aa.e ab un ke sitam men
suna hai vo sharik-e-asman hain
kahe dete hain ab dil ko sambhalo
ki ham amada-e-ah-o-fughan hain
samajhte hain hamen aur ghair ko ek
hamare aap achchhe qadr-dan hain
zara Thahro jo aa.e ho dam-e-naz.a
ki ab ham koi dam ke mehman hain
‘fahim’ itna hi kya kam hai hamen faḳhr
suno ahl-e-zaban shirin-zaban hain
Leave a Reply