kabhi ḳhushbu kabhi avaz ban jaana paḌega
parindon ko kisi bhi shakl men aana paḌega
ḳhud apne samne aate hue hairan hain ham
hamen ab is gali se ghuum kar jaana paḌega
use ye ghar samajhne lag ga.e hain rafta rafta
parindon se qafas amada karvana paḌega
udasi vazn rakhti hai jagah bhi gherti hai
hamen kamre ko ḳhali chhoḌ kar jaana paḌega
main pichhle bench par sahma Dara baiTha hua huun
samajh men kya nahin aaya ye samjhana paḌega
yahan daman pe naqsha ban gaya hai ansuon se
kisi ki justuju men duur tak jaana paḌega
ta.aruf ke liye chehra kahan se la.enge ham
agar chehra bhi ho to naam batlana paḌega
kahin sanduq hi tabut ban jaa.e na ik din
hifazat se rakhi chizon ko phailana paḌega
ḳhuda-hafiz buland avaz men kahna paḌega
phir us avaz se aage nikal jaana paḌega
jahan peshen-goi ḳhatm ho ja.egi aḳhir
abhi is raah men ik aur virana paḌega
ye jangal baagh hai ‘adil’ ye daldal ab-e-ju hai
kahin kuchh hai jise tartib men laana paḌega
Leave a Reply