Mohsin Zaidi
ḳhvahish-e-taḳht-o-taj aur hai kuchh
lekin apna mizaj aur hai kuchh
kya bharosa badalte mausam ka
rang kal kuchh tha aaj aur hai kuchh
pasdari yahan nahin chalti
is nagar ka rivaj aur hai kuchh
ḳhush na ho ham jo ho ga.e ḳhamosh
surat-e-ehtijaj aur hai kuchh
kaam chalta nahin hai marham se
zaḳhm-e-dil ka ilaaj aur hai kuchh
sochna aur udaas ho jaana
haal hi dil ka aaj aur hai kuchh
ik zamana tha ham-mizaj the ham
ab to us ka mizaj aur hai kuchh
sher kahna hai ek fan ‘mohsin’
daftari kam-kaj aur hai kuchh
Leave a Reply