Bakhtiyar Ziya
dil ka sukun aankh ka taara kise kahen
ye sochna paḌa hai ki apna kise kahen
ye shor-e-inqalab ye naqus ye azaan
hangama kaun sa hai tamasha kise kahen
rahbaniyat ka jism se fasta.iyat ki ruuh
kis ko rafiq ḳhuun ka pyasa kise kahen
sab milte-julte chehre hain dushman bhi dost bhi
qatil kise bata.en masiha kise kahen
har zarra-e-haqir hai ham-dosh mehr-o-mah
is pattharon ke Dher men hiira kise kahen
itna shu.ur de hamen ḳhallaq ḳhair-o-shar
ḳhar-o-zabun hai kaun farishta kise kahen
milna tha jo nasib se vo mil gaya ‘ziya’
hasrat kise bata.en tamanna kise kahen
Leave a Reply