afsar-mahpuri

Wo Hamari Samt Apna Rukh Badalta Kyun Nahin

vo hamari samt apna rukh badalta kyuun nahin

raat to guzri magar suraj nikalta kyuun nahin

thiik uthte hain qadam bhi raah bhi hamvar hai

bojh apni zindagi ka phir sambhalta kyuun nahin

jis tarah vo chahta hai Dhaal leta hai hamen

vo hamare dil ke paimane men Dhalta kyuun nahin

kya mohabbat men kabhi hoti hai aisi kaifiyat

vo qarib-e-jan hai lekin dil bahalta kyuun nahin

aadmi ke dil ka jauhar yuun to iman hai magar

aj-kal bazar men sikka ye chalta kyuun nahin

jaane kaisi hain ye zanjiren hamare paanv men

garmi-e-raftar se loha pighalta kyuun nahin

is maal-e-shauq par sab haath malte hain magar

tu kabhi ‘afsar’ kaf-e-afsos malta kyuun nahin

More Poems

Leave a Comment