Na Diya Us Kun Ya Diya Qasid

na diyā us kuuñ yā diyā qāsid

sach batā naama kyā kiyā qāsid

na phirā aah koī le ke javāb

jo gayā vaañ so gum huā qāsid

aaj āvegā yā na āvegā

mere ghar meñ vo dil-rubā qāsid

dil ko hai saḳht intizār-e-javāb

kah shitābī se kyā kahā qāsid

kūcha-e-yār meñ mire zinhār

jā.iyo mat barhana-pā qāsid

ḳhār-e-mizhgān-e-kushtagān-e-vafā

vaañ haiñ uftāda jā-ba-jā qāsid

nāma-e-shauq ko mire le kar

yaar ke paas jab gayā qāsid

mohr ko ḳhat kī dekh kahne lagā

kaun ‘bedār’ hai batā qāsid

jis ne bhejā hai tere haath ye ḳhat

maiñ nahīñ us se āshnā qāsid

Leave a Comment