Saleem Faraz
kuchh na.e ḳhvab har ik fasl men paale ga.e hain
ham isi jurm men basti se nikale ga.e hain
abhi zanjir-e-junun paanv men Daale ga.e hain
dekh kis samt tire chahne vaale ga.e hain
kaun is shahr-e-charaghan men abhi aaya tha
duur tak us ke ta.aqub men ujale ga.e hain
hakim-e-vaqt ke qadmon pe sabhi ibn-ul-vaqt
rakh ke dastar ko sar apna bacha le ga.e hain
tirgi kyuun na mire ḳhana-e-hasti men rahe
vo sabhi jalte charaghon ko uTha le ga.e hain
kya kahen guzre hue vaqt ke baare men ‘salim’
saḳhat mushkil se dil-o-jan ye sambhale ga.e hain
Leave a Reply