milne ko tujh se dil to mira be-qarar hai
tu aa ke mil na mil ye tira ikhtiyar hai
jis jis ke paas dosto jis jis ka yaar hai
behtar chaman se ghar men isi ke bahar hai
tum zakhm-e-dil ki mere khabar puchhte ho kya
tir-e-nigah dil ke to ab var-par hai
gar dushmani pe dost ne bandhi mire kamar
dushman hai ab jo koi mira dost-dar hai
lagti nahin palak se miri ab zara palak
aane ka is ke jab se mujhe intizar hai
ai shahsavar us ko bhi kar le tu ab shikar
ye said-e-dil bhi umr se umid-var hai
ye kuchh to haal tere divane ka ab hua
jidhar ko jaave aah use maar maar hai
ai gul tujhe aziiz huun rakhta main is liye
yaani ki tujh men ek ramaq bu-e-yar hai
ye kis ke dil ko chhin ke karte hain paemal
in zalimon ka aah yahi karobar hai
‘asif’ khuda ke vaste mat de buton ko dil
ye vo hain jin ke qaul ka kya e’tibar hai
Leave a Reply