Afzal Naved
paani shajar pe phuul bana dekhta raha
aur dasht men babul bana dekhta raha
ayyam ke ghubar se nikla to der tak
main raston ko dhuul bana dekhta raha
tu bazuon men bhar ke gulabon ko so rahi
main bhi khizan ka phuul bana dekhta raha
konpal se ek lab se faramosh ho ke main
kis guftugu men tuul bana dekhta raha
bada-kashon ke khuun se chhalakta tha mai-kada
khamiyaza-e-malul bana dekhta raha
pichhle khandar se agle khandar tak tha intizar
main aatma ki bhuul bana dekhta raha
nam-o-numud haft-jihat saunp kar mujhe
suraj dhanak men dhuul bana dekhta raha
tha sabza-e-kashida darakhton ke darmiyan
na-qabil-e-qubul bana dekhta raha
tajsim-e-nau-ba-nau ka karishma tha aur hi
main apna sa usuul bana dekhta raha
lauh-o-qalam ki khair-segali ke vaste
shiraza-e-nuzul bana dekhta raha
bante hi mit gaya tha khabar hi na ho saki
main naqsh ko fuzul bana dekhta raha
chutki se badh ke tha na hajam phir bhi main ‘naved’
ameze men hulul bana dekhta raha
Leave a Reply