Asra Rizvi
adavaton ka ye us ko sila diya ham ne
ana ko us ki hamin men Duba diya ham ne
malal-o-huzn se ho kar guzarti rahon ko
yaqin-o-shauq se paiham mila diya ham ne
misal ban ga.i mahbub aur habib ki zaat
ye aa.ina sar-e-alam dikha diya ham ne
tamam jabr-o-tashaddud ki had bhi ḳhatm hui
ki jab se sabr ko mehvar bana diya ham ne
kisi ḳhayal ka aana muhal hai ab to
tasavvurat ka ḳhema jala diya ham ne
abhi bhi ungli uThane ki rasm baaqi hai
har ik sabab ko agarche miTa diya ham ne
ab aur gharq-e-tajassus na ho miri ḳhatir
tumhen to faisla apna suna diya ham ne
ye lazmi hai ki ‘asra’ bhula diya jaa.e
jo raaz dil ki zamin men daba diya ham ne
Leave a Reply