meri ankhon ke samundar men jalan kaisi hai
aaj phir dil ko taḌapne ki lagan kaisi hai
ab kisi chhat pe charaghon ki qataren bhi nahin
ab tire shahr ki galiyon men ghuTan kaisi hai
barf ke ruup men Dhal ja.enge saare rishte
mujh se puchho ki mohabbat ki agan kaisi hai
main tire vasl ki ḳhvahish ko na marne dunga
mausam-e-hijr ke lahje men thakan kaisi hai
regzaron men jo banti rahi kanTon ki rida
is ki majbur si ankhon men karan kaisi hai
mujhe ma.asum si laḌki pe taras aata hai
use dekho to mohabbat men magan kaisi hai
Leave a Reply