Jaane Wale Se Rabta Rah Jae

Tahzeeb Hafi

jaane vaale se rabta rah jaa.e

ghar ki divar par diya rah jaa.e

ik nazar jo bhi dekh le tujh ko

vo tire ḳhvab dekhta rah jaa.e

itni girhen lagi hain is dil par

koi khole to kholta rah jaa.e

koi kamre men aag tapta ho

koi barish men bhigta rah jaa.e

niind aisi ki raat kam paḌ jaa.e

ḳhvab aisa ki munh khula rah jaa.e

jhiil saif-ul-muluk par ja.un

aur kamre men camera rah jaa.e