talḳh lamhat men jiya hua hai
main ne ye kaam bhi kiya hua hai
kya kureda hai apne zaḳhmon ko
ya koi aur saneha hua hai
kuchh dinon se main iztirab men huun
kuchh dinon se ye silsila hua hai
aise lahje men mujh se baat na kar
aj-kal mera sar phira hua hai
ek sajda hai tishna-e-masjud
ek sajda abhi ada hua hai
ab talak za.iqa nahin utra
main ne ik ghunT hi piya hua hai
pyaar men ‘roz’ e’tidal kahan
ibtida ki to intiha hua hai
Leave a Reply