hoti hai tere naam se vahshat kabhi kabhi
barham hui hai yuun bhi tabiat kabhi kabhi
ai dil kise nasib ye taufiq-e-iztirab
milti hai zindagi men ye rahat kabhi kabhi
tere karam se ai alam-e-husn-afrin
dil ban gaya hai dost ki khalvat kabhi kabhi
josh-e-junun men dard ki tughyaniyon ke saath
ashkon men dhal gai tiri surat kabhi kabhi
tere qarib rah ke bhi dil mutmain na tha
guzri hai mujh pe ye bhi qayamat kabhi kabhi
kuchh apna hosh tha na tumhara khayal tha
yuun bhi guzar gai shab-e-furqat kabhi kabhi
ai dost ham ne tark-e-mohabbat ke bavajud
mahsus ki hai teri zarurat kabhi kabhi
Leave a Reply