Poet
Darta huun arz-e-hal se dhoka na ho kahin
vo ruuTh jaa.en aur bhi aisa na ho kahin
kab tak talash dil ki karun aur kahan kahan
zulfon men dekh lijiye uljha na ho kahin
qasid mire makan ki taraf se gaya jo aaj
hota hai shak mujhe ki bulaya na ho kahin
ho jaa.e jal ke ḳhaak na ḳhud ye mira vajud
Darta huun aah ka asar ulTa na ho kahin
dil le ke apne paas bula.en vo kis liye
ye bhi to sochte hain taqaza na ho kahin
ai shaiḳh teri baat ka kya e’tibar ho
parde men is aba ke bhi duniya na ho kahin
muddat hui ki dil ko qarar-o-sukun nahin
phirta hai jaise is ka Thikana na ho kahin
un ka mariz-e-gham hai ka.i din se jan-ba-lab
vo dil men sochte hain bahana na ho kahin
ku-e-butan men tera guzar hai jo baar baar
ai dil tu aisi baton se rusva na ho kahin
‘hafiz’ ki chashm-e-tar pe nazar chahiye zarur
ye tar-e-ashk dekhiye dariya na ho kahin
Leave a Reply