Yashab Tamanna
maujud the vo mere hi andar khule hue
mujh par dua ke baa’d khule dar khule hue
ankhon ne kar diya use ruḳhsat magar abhi
rakkhe hue hain dil ne sabhi dar khule hue
kuchh to khule ki guzri hai kya ahl-e-dasht par
aa.e hain log shahr men kyon sar khule hue
ik ḳhauf hai ki jis ne uḌaa.i hai meri niind
dekhe hain main ne ḳhvab men ḳhanjar khule hue
mumkin hai phir saron ko uTha.en na faḳhr se
qabron ke dekh len jo kabhi sar khule hue
luTne men dard kya hai kabhi un se puchh len
chhoḌ aa.e the jo log ‘yashab’ ghar khule hue
Leave a Reply