Poet
iqrar hi ke saath ye inkar abhi se
dil toḌte ho kyon mira paiman-shikani se
har ik ko hai ab uns usi but ki gali se
viran huiin masjiden suune hain kalise
bosa hi mujhe do jo nahin vasl pe raazi
achchha hai vahi kaam jo ho jaa.e ḳhushi se
vaa.iz jo pata ḳhuld ka puchhe to bata duun
jannat ki taraf jaate hain us but ki gali se
baaz aao buto apni jafaon se ḳhuda-ra
toḌo na mira shisha-e-dil tang-dili se
tum aaj zarur aaoge lekin ye bata do
sachcha koi iqrar kiya bhi hai kisi se
puura kare allah mire dil ka irada
mar kar bhi na uTThun but-e-kafir ki gali se
vaa.iz ye baraste hue badal ye ghaTa.en
main bach nahin sakta kabhi tauba-shikani se
main kis se ‘fahim’ aur kahun hal-e-gham apna
allah hai agah mire dard-e-dili se
Leave a Reply