ek hangama bapa hai mujh men
koi to mujh se baḌa hai mujh men
inkisari mira sheva hai magar
ik zara zo.am-e-ana hai mujh men
mujh se vo kaise baḌa hai kahiye
jab ḳhuda mera chhupa hai mujh men
main nahin huun to mira kaun hai ye
itne janmon jo raha hai mujh men
vahi lamhe to ghazal chheḌte hain
jin ki gum-gashta sada hai mujh men
dasht-e-zulmat men ham-rah mire
koi to hai jo jala hai mujh men
Leave a Reply