har nafas taaza musibat umr bhar dekha kiye
dekhne ki shai na thi duniya magar dekha kiye
jis qayamat se Darata bhi hai Darta bhi hai shaiḳh
Thokaron men aap ki sham-o-sahar dekha kiye
tum to asuda shab-e-va.ada the ḳhvab-e-naz men
shab se le kar sub.h tak ham su-e-dar dekha kiye
barhami un ki adu ke zulm gardun ke sitam
ye to dekho afaten ham kis qadar dekha kiye
allah allah kis qadar tha naaz un ki diid par
gahe-gahe ḳhud ko bhi ham ik nazar dekha kiye
aap hi ik har taraf jalva-numa the be-hijab
aap ko dekha kiye aur umr bhar dekha kiye
ham ko har sajda tha ‘qaisar’ taj-e-shahi se siva
sar ki qimat astan-e-dost par dekha kiye
Leave a Reply