yuun bhi hota hai ki yak dam koi achchha lag jaa.e
baat kuchh bhi na ho aur dil men tamasha lag jaa.e
ham savalat ka hal soch rahe hon abhi tak
aur mathe pe mohabbat ka natija lag jaa.e
abhi divar uTha.i bhi na ho dil ki taraf
lekin is men koi dar koi daricha lag jaa.e
kya sitam hai ki vahi duur raha ho tum se
aur usi shaḳhs pe ilzam tumhara lag jaa.e
puuri avaz se ik roz pukarun tujh ko
aur phir meri zaban par tira taala lag jaa.e
aur to is ke sava kuchh nahin imkan ki ab
mere dariya men kahin tera kinara lag jaa.e
main ne aur dil ne isi baab men socha hai ki ham
kaam kuchh bhi na karen koi vazifa lag jaa.e
kya tamasha hai ki baaqi ho samundar ka safar
aur sahil se kisi roz safina lag jaa.e
ye bhi mumkin hai ki is kar-gah-e-dil men ‘zafar’
kaam koi kare aur naam kisi ka lag jaa.e
Leave a Reply