Akhtar Saeed Khan
nairangi-e-nashat-e-tamanna ajiib hai
kuchh shaam se qafas men ujala ajiib hai
sharma rahe hain tar-e-gareban-e-chak-e-dil
kuchh din se rang-e-lala-e-sahra ajiib hai
har ḳhvab-e-e’tibar shikaston se chuur hai
dil men magar ghurur-e-tamanna ajiib hai
saara badan hai dhuup men jhulsa hua magar
dil par jo paḌ raha hai vo saaya ajiib hai
phenke nahin hain aaj talak reza-ha-e-dil
TuuTe ta.alluqat ka rishta ajiib hai
jab tak nazar na kijiye yak qatra ḳhuun hai dil
lekin jo dekhiye to ye duniya ajiib hai
‘aḳhtar’ ye tere paanv ke kanTe na.e nahin
kanTon se khelta hua chhala ajiib hai
Leave a Reply