Khursheed Akbar
mat use haath lagana vo sajan aag hai aag
tum use ḳhaak samajhte ho badan aag hai aag
us ki hasrat men bhale log mare jaate hain
kaun samjha.e ki vo ghuncha-dahan aag hai aag
apni tahzib ko paani ki zarurat hogi
chuum aaya huun lab-e-gang-o-jaman aag hai aag
vo jo momin hai to miTTi hi kafan hai us ka
aur kafir hai to phir us ka kafan aag hai aag
saare sayyare sitare bhi hain atish-pare
ye zamin aag ki hai nil-gagan aag hai aag
phuul khilte hain ki barud ḳhabar bhi dena
kitna shadab hai aur kitna chaman aag hai aag
sard alfaz ko baḳhshi hai hararat kis ne
rashk-e-‘ḳhurshid’ hai vo us ka suḳhan aag hai aag
Leave a Reply