ho sitam kaisa bhi ab halat ki shamshir ka
vaqt badlega kisi din rukh miri tasvir ka
jan-leva hai tumhara be-niyazi ka chalan
hashr dekhe hi banega ab dil-e-dil-gir ka
baithti hai kaun si karvat ye baazi ishq ki
gardishon ke haath men hai faisla taqdir ka
kaun bandhega miri bikhri hui ummid ko
khul raha hai ab to har halqa miri zanjir ka
lutf lete ho kaman se chhod kar jis ko ab aap
kaash koi mujh se puchhe kya hua us tiir ka
rekhta se ishq ‘azim’? vo bhi aise daur men
dekhna kya haal hota hai tiri tahrir ka
Leave a Reply