Sarfraz Nawaz
nazar bhi aaya to ḳhud se chhupa liya main ne
ye kaun hai jise apna bana liya main ne
tumhara lams chhupa hai badan ki parton men
chhua jo ḳhud ko laga tum ko pa liya main ne
usi ke samne jo rahmaton ka malik hai
shikayaton ko dua men mila liya main ne
na kuchh dava ki zarurat na chara-gar ki talash
ye rog kaun sa dil ko laga liya main ne
jhulas gaya huun jala huun dhuan dhuan ho kar
andheri raat se tum ko bacha liya main ne
vo milne-julne ke mausam guzar ga.e kab ke
mila jo koi gale se laga liya main ne
tumhare sach ki hifazat men yuun hua akasr
ki apne-ap ko jhuTa bana liya main ne
Leave a Reply