teri nazar ka rang baharon ne le liya
afsurdagi ka ruup taranon ne le liya
jis ko bhari bahar men ghunche na kah sake
vo vaqi.a bhi mere fasanon ne le liya
shayad milega qariya-e-mahtab men sukun
ahl-e-ḳhirad ko aise gumanon ne le liya
yazdan se bach raha tha jalalat ka ek lafz
us ko haram ke shoḳh bayanon ne le liya
teri ada se ho na saka jis ka faisla
vo zindagi ka raaz nishanon ne le liya
afsana-e-hayat ki takmil ho ga.i
apnon ne le liya ki beganon ne le liya
bhuli nahin vo qaus-e-quzah ki si suraten
‘saghar’ tumhen to mast dhiyanon ne le liya
Leave a Reply