udaas dekh ke vaj.h-e-malal puchhega
vo mehrban nahin aisa ki haal puchhega
javab de na sakoge palaT ke maazi ko
ik ek lamha vo chubhte saval puchhega
dilon ke zaḳhm dahan men zaban nahin rakhte
to kis se za.iqa-e-indimal puchhega
kabhi to la ke mila mujh se mere qatil ko
jo sar hai dosh pe tere vabal puchhega
ye kya ḳhabar thi ki siine ke daagh lau denge
koi jo mehnat-e-fan ka ma.aal puchhega
tu harf-e-ishq-o-basirat hai lab na si apne
zamana tujh se bhi tera ḳhayal puchhega
mujhe tarash ke rakh lo ki aane vaala vaqt
ḳhazaf dikha ke guhar ki misal puchhega
bana ke phuul ki ḳhushbu phira.egi sadiyon
hava se kaun rah-e-e’tidal puchhega
ye ek pal jo hai maj.hul shaḳhs ki surat
mizaj-e-agahi-e-mah-o-sal puchhega
yahan ta.ayyun-e-aqdar bhi zaruri hai
ḳhud apne mushk ki qimat ghazal puchhega
mira qalam abdiyat ki raushni hai ‘faza’
is aftab ko ab kya zaval puchhega
Leave a Reply