Jazib Quraishi
jan-soz ghamon ka kahin iz.har nahin hai
zindan men bhi zanjir ki jhankar nahin hai
har shaḳhs ke chehre pe hai kuchh aisi alamat
jaise vo koi phuul hai talvar nahin hai
sab gahre samundar men khaḌe soch rahe hain
ham men koi suraj ka parastar nahin hai
zaḳhmon ka lahu ho ki charaghon ka ujala
koi bhi mire shahr men bedar nahin hai
main tujh se bichhaḌ kar yahi samjha huun ki duniya
divar to hai saya-e-divar nahin hai
ḳhush-rang zuleḳhaon ke bazar men ‘jazib’
koi gham-e-yusuf ka ḳharidar nahin hai
Leave a Reply