Majid Ali Kavish
ibtida ka intiha se rabta bandhe hue
ghar se nikla huun safar ka mudda.a bandhe hue
be-yaqini ka ye aalam ho gaya hai aj-kal
aadmi das das jagah hai aasra bandhe hue
vo to is ke hukm se hota hai jo bhi faiz ho
kimiya kab hai shifa ka madda bandhe hue
fikr-o-fan ki mahfilon men ab ye manzar aam hain
be-hunar be-ilm dastar-e-ana bandhe hue
un ke pakiza iradon ki hifazat ai ḳhuda
be-libason men hain jo band-e-qaba bandhe hue
zindagani ki haqiqat ye samajh lijiye ki bas
bulbula hai ek tufan-e-bala bandhe hue
kar-amad jaan kar ik ala-e-guft-o-shunid
phir rahe hain log daman se qaza bandhe hue
Leave a Reply