zaḳhmon ne mujh men darvaze khole hain
main ne vaqt se pahle Tanke khole hain
bahar aane ki bhi sakat nahin ham men
tu ne kis mausam men pinjre khole hain
barson se avazen jamti jaati thiin
ḳhamoshi ne kaan ke parde khole hain
kaun hamari pyaas pe Daaka Daal gaya
kis ne mashkizon ke tasme khole hain
varna dhuup ka parbat kis se kaTta tha
us ne chhatri khol ke raste khole hain
ye mera pahla ramzan tha us ke baghair
mat puchho kis munh se roze khole hain
yuun to mujh ko kitne ḳhat mausul hue
ik do aise the jo dil se khole hain
mannat manne valon ko malum nahin
kis ne aa kar peḌ se dhage khole hain
dariya band kiya hai kuuze men ‘tahzib’
ik chabi se saare taale khole hain
Leave a Reply