Aslam Ansari
vo naḳhl jo bar-var hue hain
ashob-e-ḳhizan se Dar rahe hain
shaḳhon pe tiir ke zaḳhm hain ye
ya phir se gulab jhankte hain
zulmat men bahut hi yaad aa.e
vo chand jo ham-safar rahe hain
le dast-e-havas ye phuul tere
kanTe to vafa ne chun liye hain
badla na navishta-e-maqdur
maktub to ham ne bhi likhe hain
pamal-e-jahan hue ki ham ne
kuchh ḳhvab jahan ko bhi diye hain
TuuTi hai kahin sada ki zanjir
halqe se ḳhayal ke paḌe hain
sahra ka sukut kah raha hai
shahron ke charagh bujh ga.e hain
ai ishq-e-junun-shi.ar tere
duniya men ajiib silsile hain
chamki hai jo sarnavisht-e-adam
tahzib ke naqsh ban ga.e hain
afaq ki vus.aton se aage
kuchh aur charagh jal uThe hain
insan ka shu.ur kah raha hai
insan ne bahut se dukh sahe hain
Leave a Reply