Ghulam Murtaza Rahi
hain aur ka.i ret ke tufan mire aage
phailega abhi aur bayaban mire aage
bahar nahin koi bhi miri had-e-nazar se
maḳhfi hai koi koi numayan mire aage
hasti miri sahra hai sarab us ka muqaddar
aḳhir use hona hai pasheman mire aage
huun miil ke patthar ki tarah rahguzar men
manzil pe nazar rakhte hain insan mire aage
tai ho na saki duri-e-manzil ye alag hai
har moḌ pe raushan raha imkan mire aage
kandhe pe mire bojh raha raḳht-e-safar ka
yuun nikla kiye be-sar-o-saman mire aage
jo sulh-o-safa.i men hain pichhe abhi ‘rahi’
rahte hain baham dast-o-gareban mire aage
Leave a Reply