ruuh aur badan donon daagh daagh hain yaaro
phir bhi apne bam-o-dar be-charagh hain yaaro
aao ham men Dhal jaao umr bhar ke pyase hain
tum sharab ho yaaro ham ayagh hain yaaro
jin pe barish-e-gul hai un ka haal kya hoga
zaḳhm khane vaale bhi baagh baagh hain yaaro
jin ko rah ke kanTon men ḳhush-mizaj hona tha
vo maqam-e-gul pa kar be-dimagh hain yaaro
ham se mil ke fitrat ke pech-o-ḳham ko samjhoge
ham jahan-e-fitrat ka ik suragh hain yaaro
na-shanason ki tahsin rang laa.i hai kya kya
koile bhi ab lal-e-shab-charagh hain yaaro
ham hasin ghazlon se peT bhar nahin sakte
daulat-e-suḳhan le kar be-faragh hain yaaro
Leave a Reply