tiri barq-pash-nigah se tire hashr-ḳhez-ḳhiram se
ba-sukun-e-qalb guzar gaya main har ek aise maqam se
miri zindagi ke ye marhale hama-ittiqa hama-bandagi
mujhe kaif un ki nazar se hai koi vasta nahin jaam se
vo laja ga.e vo jhijhak ga.e vo Thahar ga.e kisi soch men
sar-e-rah kisi ne jo daf.atan unhen di sada mire naam se
main huun sham-e-mahfil-e-javedan miri zindagi nahin muḳhtasar
main charagh-e-rahguzar nahin jo bujha bujha sa ho shaam se
vo lihaz-e-pir-e-mughan nahin vo mazaq-e-bada-kashi kahan
hamen phir ata ho mai-e-kuhan na.e daur men na.e jaam se
tira zikr sun ke taḌap uTha tira naam le ke main ro diya
mujhe ek nisbat-e-ḳhas hai tire zikr se tire naam se
na raha ‘mushir’ hi tishna-lab sar-e-bazm saqi-e-be-ḳhabar
koi bada-kash nahin mutma.in tire mai-kade ke nizam se
Leave a Reply