mohabbat bhi hua karti hai dil bhi dil se milta hai
magar phir aadmi ko aadmi mushkil se milta hai
mohabbat jab maza deti hai dil jab dil se milta hai
magar mushkil yahi hai dil se dil mushkil se milta hai
siva.e yaas kya is sa.i-e-be-hasil se milta hai
tira dil o sitamgar kab kisi ke dil se milta hai
ajab riqqat-faza hai aḳhiri milne ka nazzara
gale lag lag ke bismil ḳhanjar-e-qatil se milta hai
sara-e-dahr men tanta bandha hai karvanon ka
adam ka ai ‘vafa’ rasta isi manzil se milta hai
Leave a Reply