Nadeem Sirsivi
riyazaton ki tapish men rah kar pighal raha huun
ye baat sach hai main dhire dhire badal raha huun
alamat-e-ḳhak-zadgi ho mazid raushan
bas is liye ḳhaak apne chehre pe mal raha huun
utaar kar qarz zindagani ka rafta rafta
nafas ke vahshat-kade se bahar nikal raha huun
ana-paraston ke beach apni ana ke sar ko
huun munkasir is liye musalsal kuchal raha huun
dua.en maan ki qadam qadam sa.eban bani hain
‘nadim’ gir gir ke is liye main sambhal raha huun
Leave a Reply