izn-e-khiram lete hue asman se ham
hat kar chale hain rahguzar-e-karvan se ham
kya puchhte ho jhumte aae kahan se ham
pi kar uthe hain khum-kada-e-asman se ham
kyunkar hua hai faash zamane pe kya kahen
vo raz-e-dil jo kah na sake raz-dan se ham
hamdam yahi hai rahguzar-e-yar-e-khush-khiram
guzre hain laakh baar isi kahkashan se ham
kya kya hua hai ham se junun men na puchhiye
uljhe kabhi zamin se kabhi asman se ham
har nargis-e-jamil ne makhmur kar diya
pi kar uthe sharab har ik bostan se ham
thukra diye hain aql o khirad ke sanam-kade
ghabra chuke the kashmakash-e-imtihan se ham
dekhenge ham bhi kaun hai sajda taraz-e-shauq
le sar utha rahe hain tire astan se ham
bakhshi hain ham ko ishq ne vo juraten ‘majaz’
darte nahin siyasat-e-ahl-e-jahan se ham
Leave a Reply